Նախորդ տարիներու հետեւողութեամբ, այս տարի եւս, մեր աշակերտները առիթ ունեցան այցելելու NDU համալսարան, որպէսզի ծանօթանան ու հետեւին գործնապէս և անմիջականօրէն, ապագայի իրենց ընտրելի կամ նախասիրելի ճիւղերուն ու մասնագիտութիւններուն, պատկան դաստիարակներու հսկողութեամբ, բացատրութեամբ կամ նկարագրութեամբ:
Այցելութիւնը տեղի ունեցաւ Ուրբաթ, 8 Ապրիլ 2022ին, երբ 11րդ դասարանի աշակերտութիւնը, առաջնորդութեամբ փոխ-տնօրէնուհի Տիկ. Մարալ Պալեօզեանի և հերթապահ Պրն. Գէորգ Կարապետեանի, ուղղուեցան տուեալ համալսարանի հանդիսասրահը, ուր դիմաւորուեցան մասնագէտ պատասխանատուներու կողմէ, իրենց գրասեղաներուն վրայ ունենալով անհրաժեշտ պիտոյքները, առարկաները և ընդհանրապէս այն բոլոր իրերը, նմուշներն ու իրերը, որոնք կ'առընչուէին բացատրելի նիւթերուն ու մասնագիտութիւններուն հետ:
Իւրաքանչիւր աշակերտ մօտենալով սեղանիկներուն մօտ, ուր կը գտնէր իր ապագայի հաւանական ընտրութիւնը կամ ասպարէզը, կ'իրազեկուէր անոր ընթացքին, կառոյցին, կազմութեան և յարակից բազմաթիւ մանրամասնութիւններուն, կենդանի պատկերներով ու տեղեկութիւններով լուսաբանուելով, նաեւ իր հարցումներուն ու հետաքրքրութիւններուն յագուրդ տալով:
Ընտրութիւնները կը վերաբերէին բժշկութեան, հիւանդապահութեան, երկրաչափութեան, ճարտարապետութեան, տնտեսագիտութեան, հոգեբանութեան, ուսողութեան, առեւտրականութեան, լեզուագիտութեան ու բազմատեսակ այլ բնագաւառներու:
Անտարակոյս, խիստ շահեկան և ուսանելի միջոցառում, որ այժմէն ուսանողը կը կողմնորոշէ կամ կը նախապատրաստէ դէպի այն կալուածը կամ մարզը, որ կրնայ իրեն համար ըլլալ ճիշդ ուղիի մը հասնելու նպատակակէտ մը:
Տնօրէնութիւնը նախանձախնդիր է, որ ուսանողը այս նախաձեռնութենէն առաւելագոյնս օգտուի, հաստատուն քայլերով ուղղուելու դէպի իր ապագան: