Հայոց Ցեղասպանութեան 107 Ամեակի Տպաւորիչ Ոգեկոչում

Thu, 9 Jun 2022

Այս տարի, Հայոց Ցեղասպանութեան 107 ամեակի ոգեկոչումը մասնայատուկ երանգ մը ստացաւ, քանի տեղի կ'ունենար խառնաշփոթ կացութեան մը մէջ, մասնաւորաբար հայ ժողովուրդին համար, իր հայրենական, Արցախեան ու սփիւռքեան թեւերով, որոնք կ'անցնէին (ու կ'անցնին) բաւական տագնապոտ ժամանակներէ, որոնց դէմ պայքարիլը կը կարօտէր համապատասխան դիմադրութիւն ու միասնականութիւն միանգամայն:

Վստահաբար այս էր պատճառը, որ լիբանանահայութիւնը միահամուռ համախմբուածութեամբ և ուժականութեամբ հանդէս եկաւ, իր եկեղեցական, ազգային, քաղաքական,  միութենական, կրթական, մշակութային կառոյցներով, արժանի հովանաւորութիւն ու հոգատարութիւն տալով անոնց:

Կը բաւէր ակնարկ մը նետել 23 Ապրիլի երիտասարդական-պատանեկան փառատօնին, Անթիլիասի մայրավանքի շրջափակէն ներս, ուր արտասանուած ոգեշնչելի խօսքերն ու ծաղկեպսակներու զետեղումը կը յուշէին բարձր գիտակցութեան և յանձնառութեան ոգի մը:

Իսկ 24 Ապրիլին, շատ աւելի մեծ տարողութեամբ կատարուեցաւ նշումը, համաժողովրդական մասնակցութեամբ և յատկապէս սկաուտական-անդամակցական հոյակապ շքերթներով, փողերախումբերու տպաւորիչ հնչեղութեամբ, դարձեալ ուղղուելով դէպի մայրավանք:

*

*     *

Միութեան վարժարաններուս աշակերտները զուտ դպրոցական մակարդակով, 29 Ապրիլին, մատուցեցին սքանչելի յայտագիր մը, գեղարուեստական բովանդակութեամբ, ուր ցուցաբերեցին իրենց շնորհները, նուիրուած 107 ամեակին:

Սանուհի Մարալ Կիրիթլեան (10րդ դասարան), իր խնամուած բացման խօսքով, անդրադարձաւ Հայոց Ցեղասպանութեան եղելութեան և անոր հետեւանքներուն և թէ՝ ինչպէս պէտք է զօրավիգ կանգնիլ մեր պահանջատիրութեան և իրաւունքներու ձեռք բերման:

Երկրորդ խօսք առնողը եղաւ սանուհի Արփի Սարեան (10րդ դասարան), որ ընդգծեց Հայոց Ցեղասպանութեան հետապնդման կարեւորութիւնն ու անժամանցելիութիւնը, ակնկալելով որ ամէն ոք անոր իրականացման իր նպաստը բերէ:

Երրորդ խօսք առնողը եղաւ սան Կարէն Պաղսարեան (10րդ դասարան), որ շեշտը դրաւ Հայոց Ցեղասպանութիւնը միշտ պահելու իր կիզակէտին վրայ, հայ աշակերտութիւնը և երիտասարդութիւնը ըլլալով այն կորիզը, որուն պէտք է վստահիլ այս երթուղիին շարունակականութիւնը:

Չորրորդ խօսք առնողը եղաւ սան Պերճ Կէօքճեանը (10րդ դասարան), որ Հայոց Ցեղասպանութիւնը ու զայն անմոռաց պահելու անհրաժեշտութիւնը նկատեց նոր սերունդին մնայուն օրակարգը դէպի աւելի բարձր և արդիւնաբեր ապագայ:

Այս գովելի արտայայտութիւններուն զուգահեռ, մէջ ընդ մէջ, աշակերտական-դասարանային կատարումները աւելի ոգի ու հմայք տուին Հայոց Ցեղասպանութեան ոգեկոչումին, հետեւեալ յաջորդականութեամբ.

Արտասանութիւն      «Daughter of Armenia»    Դ. դասարան

Երգ                       «Հայորդիք»                           Դ. դասարան

Նուագ                  «Թամզարա»                         Դ. դասարան

Նուագ                  «Եարխուշտա»                      Ծաղիկ դասարան

Երգ                       «Գետաշէն»                            Բ. դասարան

Նուագ                  «Կիլիկիա»                             Էդուարդ Դայեան

Երգ                       «Remember»                           Ե. դասարան

                             Ara Kevorkian           

Պար       «Կարմիր Կապոյտ Ծիրանագոյն»      Ա. դասարան

Կ'արժէ արձանագրել, որ բոլոր մասնակիցները՝ խմբային թէ անհատական, ապրումներով ու ներշնչումներով կատարեցին իրենց վարակիչ դերերը, արժանանալով բոլորին գնահատանքին, իսկ մենապարուհի Ժանէթ Ճունթոյեան, «Տուն Իմ Հայրենի» պարով, Էդուարդ Դայան, «Կիլիկիա» նուագով, Էնտրիւ Յակոբեան, «The Armenian and The Armenian» (Ուիլիըմ Սարոյեան) արտասանութեամբ, աւելի ճոխացուցին յայտագիրը:

Տնօրէն՝ Պրն. Արա Վասիլեան, Հայոց Ցեղասպանութիւնը համարեց համազգային պարտականութիւն մը, որ իւրաքանչիւր հայորդիի սրբազան սեփականութիւն պէտք է ըլլայ և, այս առիթով, ջերմապէս շնորհաւորեց բոլոր մասնակիցներուն շնորհալիութիւնները, նաեւ պատասխանատու ուսուցչուհիներուն օգտակար օժանդակութիւնները՝ Տիկիններ Արմիկ Եաղըլեան, Վարիա Ճունթոյեան, Մեղեդի Քեսապլեան, Օրդ. Թալին Մելիքեան, Տիկ. Թամարա Շիր Յակոբեան, Տիկ. Ռիթա Աբրահամեան և Օրդ. Սօսի Ալոզեան:

DSC_3692.JPG
3.8 MB
View
DSC_3720.JPG
3.9 MB
View
DSC_3723.JPG
3.8 MB
View
DSC_3741.JPG
3.9 MB
View
DSC_3757.JPG
3.8 MB
View
DSC_3784.JPG
3.8 MB
View
DSC_3799.JPG
3.8 MB
View

Name
Title
Comment