Հայ ժողովուրդի ազգային տօներուն մէջ, որպէս առաջնային և արժեչափային երեւոյթ, բազմաթիւներու շարքին, ամենէն նուիրականը կը նկատուի «Թարգմանչաց տօն»ը, իր բարեբերութեամբ և օրինակելիութեամբ, իմաստասիրութեամբ և օգտաշատութեամբ, դառնալով անոր գոյութեան հիմնական յատկանշելիութիւններէն մէկը:
Հայերէնագիտութեան մեր ուսուցիչները, անկախաբար իրենց ընթացիկ դասաւանդութիւններէն, միշտ ալ շեշտը դրած են այս տօնին կարեւորութեան և ուսանելիութեան վրայ, ամէն ատեն որ առիթը ընծայուի, ատենամարզանքներու ընթացքին թէ անկէ դուրս:
Հինգշաբթի, 14 Հոկտեմբեր 2021ին, Միութեան վարժարաններու աշակերտութիւնը համախմբուած էր դպրոցի շրջաբակին մէջ, ուսուցիչներու առաջնորդութեամբ ու ներկայութեամբ նշելու այս տօնը, ուր ցուցատախտակներու վրայ գեղազարդուած էին՝ ԱԲԳը, թարգմանիչները ու զանոնք յուշող արձանագրութիւններ:
Լիբանանի ու ՀԲԸ Միութեան քայլերգներու յոտընկայս ունկնդրութենէն ետք, աշակերտուհի Մարալ Կիրիթլեան (10րդ դասարան), լաւագոյն ձեւով ներկայացուց պատմական այս տօնին խորհուրդը և անոր կառչած մնալու ազգային անհրաժեշտութիւնը:
Այնուհետեւ, սկիզբ առաւ աշակերտական գեղարուեստական յայտագիրը, որուն իրենց մասնակցութիւնը բերին դասարանային խմբակներ, իրենց հոգեպարար դերակատարութիւններով, արտայայտութիւններով և երեւումներով, ուր՝ աշակերտական երանգն ու անկեղծութիւնը, սրտամօտիկութիւնն ու պարզութիւնը ակնյայտ էին և ցոյց կու տային անոնց մանկունակ ոգիներուն անբասիրութիւնը և նուիրուածութիւնը:
Յայտագիրը արդէն կը հաստատէ, որ աշակերտութիւնը ինչպիսի բովանդակութեամբ և ոգեւորութեամբ պատրաստուած էր այս տօնին ոգեկոչման, շնորհիւ իր ուսուցչուհիներուն՝ Հայարփի Ճերեճեանի, Մանուշակ Ալեքսանեանի, Մեղեդի Քեսապլեանի և Վարիա Ճունթոյեանի, բծախնդիր ու հետեւողական ճիգերուն: Անոնք՝ արտասանութեամբ, պարով, խմբերգով թէ ընթերցումով, ոչ միայն ճոխացուցին յայտագիրը, այլեւ արժանին մատուցանեցին «Թարգմանչաց տօն»ին յիշատակութեան:
Ահաւասիկ յայտագիրը.
Արտասանութիւն - «Հայ Լեզուն Տունն Է Հայուն» - Զ. դասարան
Պար - «Չինարի» (Կոմիտաս) - Շանէլ Էլսուէյտի
Արտասանութիւն - «Իմ Հայ Լեզու» - Գ(Ա) դասարան, «Մեսրոպ Մաշտոցին» - Գ(Բ) դասարան
Արտասանութիւն - «Հայերէն» - Ե. դասարան
Խմբերգ - «Իմ Մայր Լեզու» - Ե. դասարան
Արտասանութիւն - «Գիրքը» - Բ. դասարան
Արտասանութիւն - «Այբուբեն Հայոց» - Դ. դասարան
Պար - Ժանէթ Ճունթոյեան
Արտասանութիւն - «Հայոց Լեզուն» - Է. դասարան
Ընթերցում - «Գովք Այն Լեզուին Որով կը Խօսինք» - Թ. դասարան
Պար - «Բարի Օր» - Ա. դասարան
Յիշենք որ՝ Ա. դասարանի «համովիկ»ները, իրենց պարային ու շարժուձեւային գրաւիչ արտայայտութիւններով, յատուկ երանգ տուին տօնակատարութեան, խանդավառելով ամբողջ աշակերտութիւնը և ուսուցչակազմը:
Տնօրէն Պրն. Արա Վասիլեան, խիստ գնահատելի գտաւ, այս դժուարին ու պրկուած պայմաններուն մէջ, «Թարգմանչաց տօն»ին մեծարումը և անոր նուիրուած աշակերտական այս քաջալերելի նախաձեռնութիւնը, լաւագոյն արտայայտութիւններով ու մասնակցութիւններով, նաեւ շնորհաւորելի՝ ուսուցչուհիներուն բերած նպաստը և օժանդակութիւնը, ստեղծելով նման ոգեշնչելի հայրենահունչ ու գողտրիկ մթնոլորտ մը: