Այս տարի, վերամուտը սկսաւ խոստմնալի և յուսադրող տրամադրութիւններով, հաւատալով որ ան անխափան և անսայթաք ընթացք մը կ'ունենայ:
Աշակերտութիւնը խանդավառութեամբ ու վճռակամութեամբ յաճախած էր վարժարան, պատշաճօրէն դիմաւորելու վերամուտը, համոզուած ըլլալով որ անիկա իր հարազատ երկրորդ տունն է, ուր ամբողջ կրթական տարեշրջան մը պիտի բոլորէ:
Այս առիթով, մարմնամարզանքի ժրաջան ուսուցչուհի Տիկ. Նայիրի Հայրապետեան-Էլսուէյտի, պատրաստած էր խնամեալ ծրագիր մը, ֆիզիքական, կազմակերպչական, ընկերային, ժամանցային ու խաղային հրապուրիչ պատկերներով ու մանրամասնութիւններով, որոնք մեծ ոգեւորութիւն ստեղծեցին մասնակիցներուն մօտ, հոն գտնելով նաեւ ուսուցողական ու դաստիարակչական պահեր:
Նման վերամուտեան ընտրանքը գիտակցուած էր, աշակերտութեան մօտ առաջացնելու հետաքրքրութիւն ու կապուածութիւն իրենց վարժարանին նկատմամբ, ուսումնական կեանքի կողքին, մարզական ոգին և առողջ յարաբերութիւններու կամքը ցուցադրելով և երաշխաւորելով անոնց արդիւնաւէտութեան օգտակարութիւնը:
*
* *
Այս պատեհութեամբ, կ'արժէ շնորհակալութիւն յայտնել մեր վարժարաններու Տիկնանց Յանձնախումբի ջանադիր անդամներուն, որոնք վերամուտի այդ օրը վերածեցին տօնակատարութեան, իրենց պատրաստած համեղ կրկնեփներով ու համադամներով, հիւրասիրելով մեր սաներն և ուսուցչակազմը: