Երբ Սեպտեմբեր եկաւ,

Մենք պայուսակ բռնեցինք,

Մանկապարտէզ կարօտցած՝

Դէպի դպրոց մենք գացինք:

Հինգշաբթի, Սեպտեմբեր 29ի առաւօտեան խանդավառ մթնոլորտ կը տիրէր մանկապարտէզէն ներս:  Գոյնզգոյն փուչիկներով զարդարուած մուտքը դասարաններն ու բակը պատրաստ էին դիմաւորելու սիրասուն մանուկները:

Ճիշդ ժամուն հնչեց առաջին զանգը աւետելով 2022-2023 կրթական տարեշրջանին վերամուտը:  Ժրաջան երեխաները նախ աղօթեցին, ապա Մանկապարտիզպանուհի Օրդ. Սոնիա Տեյիրմենճեան բարի գալուստի խօսքերով ողջունեց զիրենք և բարի վերամուտ մաղթեց բոլորին, ցանկալով գործունէութեամբ հարուստ ուսումնական տարեշրջան մը:

Աշակերտները իրենց դաստիարակներուն գլխաւորութեամբ ուղղուեցան դէպի դպրոցին մեծ բակը, ուր վերամուտը վերածուեցաւ տօնակատարութեան:  Ճոխ երգերուն զուգահեռ՝ անոնք պարեցին, մասնակցեցան զանազան դաստիարակչական խաղերու, գեղեցիկ ձեռային աշխատանքներ կատարեցին և փուչիկներով նկարուեցան: 

Օրուան ընթացքին փոքրիկները հիւրասիրուեցան կրկնեփուկներով՝ պատրաստուած վարժարանիս Տիկնանց Օժանդակ Կազմի անդամուհիներուն և հերթաբար ծանօթացան իրենց ուսուցչուհիներուն ու անոնց դասաւանդած նիւթերուն:

Առաջին օրը հեզասահ անցաւ ու կէսօրին փոքրերը տուն մեկնեցան բարձր տրամադրութեամբ և գունաւոր փուչիկներով:

3 Հոկտեմբեր 2022ին Մանկապարտէզի Ծիլ դասարանը վերաբացաւ իր դռները և իր խնամքով յարդարուած ջերմ յարկին տակ ընդունեց անուշիկ Ծիլերը: